跳至主要內容
價勢堂
捉蟲 11/2/2019

中國人好得意,中意熱鬧,以至搏大堆,仲會感覺上覺得龍年特別好,所以唔知點解無啦啦好多人想o係龍年生仔。幾年前(2012)o既龍年效應所衍生o既問題陸續浮現,弊傢伙,由入醫院爭床位等出生仔開始,好似打木人巷咁打完一關又一關,大件事,唔少人呻笨話自己捉蟲。

 

龍年突然人口出生量大增,除o左爭醫院床位等BB出世,之後仲有排捱,包括爭幼稚園、小學、中學、大學以至將來到社會工作,做乜鬼呢個時候都多D人出來同你競爭。即係話成功機會低o左。

 

有好多機會只係得一個位,畀人贏o左就無,例如當年倫文敘同柳先開上京科舉殿試爭狀元咁,兩個實力都不相伯仲,唔好講話爭個馬鼻咁遠,實情可能只係差一條線咁多。同一年考狀元,狀元爺只得一個,輸oo個個就只得低一級o既榜眼,真係睇下邊個唔好彩。

 

若果倫文敘同柳先開o係唔同年期上京考狀元,可以各自各精采,齊齊中狀元。想當年三國時代周瑜已經有一句既生瑜何生亮,要兩個絕頂聰明人士對撼,的確殘忍。

 

各位家長若果明白呢個問題,唔好再貪意頭乜年生仔,否則只會玩死自己同個細路。人人都呢一年一齊生仔,淨係爭租樓買樓都要大D,咁多人一齊爭乜鬼都貴o左些少啦,競爭亦加大。順其自然,或者會減少自己好多麻煩同困難,睇得明白呢篇文章,下次唔好啦!睇唔明就話之你!

 

相關標籤
私人住宅           租金          樓價          香港         

劉晨
我叫劉晨,唔係樓神,
只想大家買賣物業時留神,
以免頭痕。