跳至主要內容
價勢堂
下月加息香港未必加足 8/11/2018

美國聯邦儲備局本週議息,劉晨斷估公開市場委員會唔會o係十一月加息,不過下月就預備佢加硬0.25厘都得,無乜雞走。至於香港會否跟到足,機會又係一半半,未必跟得晒都唔出奇!

 

美國加息加o左咁耐,香港頭七次都唔理佢,去到加第八次,跟……..少少,一半咁啦!即係話,香港仲算銀根鬆動,頂得住美國與香港之間o既息差衝擊,加到兩厘先至跟些少。

 

算唔算香港把炮,一DD咁睇啦。事關2008年環球金融海嘯後,美國減息減到0息咁滯,若果劉晨無記錯o既話,o個陣好似香港完全無跟住減喎。既然上一排無減,呢一排唔加亦有理由吖。

 

下月美國應該加硬,聯儲中人一為神功二為弟子,美國總統特朗普竟然連續幾次破口大罵,鬧美國同其他國家搞緊貿易戰,聯儲局唔顧大局走去加息,搞到政府踢晒腳,侵侵話好嬲加息行動喎!

 

正路計算,聯儲局係有獨立性,有自主權,唔使睇政府面色,通脹有壓力就要加啦!侵侵出聲,佢地仲加要企硬,否則聯儲局聽侵話等同自廢武功,以後點見人!所以下月實加硬息。香港點,唔排除好似上一次咁,加一半或者加貸息唔加存息。

 

點解,表面講加息有利銀行,但是,香港加息變成銀行倒貼存戶,蝕水!仲有係第四季起貸款市場增長越玩越縮,由雙位增長步入個位增長,存貸全面加息0.25厘,香港咁多存款,銀行畀息都畀死,來個鴛鴦息加D唔加D又有幾奇?

 

相關標籤
利息           加息           聯儲局          香港         

劉晨
我叫劉晨,唔係樓神,
只想大家買賣物業時留神,
以免頭痕。