跳至主要內容
價勢堂
波濤洶湧與波平如鏡 11/1/2019

行入2019年,頭十頭八日環球投資市場稱得上是波濤洶湧,投資者投機者一不留神被連環摑幾巴有乜出奇。所以有唔少金融重量級人物同投行都說今年會大上大落,各路英雄睇車呀,不過亦有高人指出會比較平靜。信邊個自己執位,輸o左咪賴人!

 

前年香港股市平地一聲雷,oo彭聲勁升36%,簡直唔聲唔聲嚇你一驚!以為2018年都係咁筍,尤其是1月份恆生指數彈上33,484點歷史高峰,40,000點近在咫尺,點知原來齊齊摸頂,然後撻到癱癱腰!

 

燊哥曾經上電視時公開演唱過一句o既「賭仔自嘆之二」,第一句就係「輸完又o黎賭過」!人人寄望2019年有望翻身甚至翻生!

 

2019年港股開市第一日喪插715點,跌幅2.77%,嚇到好多人腳軟,點知後來日日升多過跌,重返26,000點樓上。又有投行指稱會重見30,000點,不過好多重量級人士指出今年波動更超去年。日前有聯匯之父稱號o既景順投資首席經濟師祈連活預計,今年環球市場將較去年平靜。

 

投資同投機就係咁,有人唱好有人唱淡,若果單邊睇好單邊睇淡就好易變成無成交,唔成市。市場波濤洶湧與波平如鏡都有預測,信邊個高手,自己埋位,輸o左咪賴人,呢D係自己o既選擇。不過劉晨就無咁大膽,仲係覺得樓市稍稍穩陣,輸o左都有樓住喎,起碼唔使交租。

 

而且強積金仲有大大舊錢o係個股市度,o個度秒秒鐘都一千幾百蚊上落,你估o野少,心血少會嚇親。咁仲唔夠呀,仲炒咁多!

 

 

相關標籤
私人住宅           投資者          股市                              香港          全球         

劉晨
我叫劉晨,唔係樓神,
只想大家買賣物業時留神,
以免頭痕。