跳至主要內容
價勢堂
乜o野叫做「夠」 12/2/2019

七十年代初劉晨讀初中之時,車衣女工大概月薪三百元。其時諗過自己要搵幾多一個月先至夠過活,覺得四百蚊應該掂。

 

但是,當年劉晨只是o靚仔一名,乜叉都唔識,乜o野叫做通脹、銀紙貶值、加薪、加租、加息、減息,根本只係識條鐵。過多幾年出來工作有八百蚊,以為仲掂,點知,當然唔係呢回事。

 

好多人成日講,夠使就得!係呢一年可能「夠」,下一年或者已經唔同世界,香港仲叫做好些少,幣值算穩定,你去到中南美,搭程的士落車都分分鐘唔夠錢找數,除非你用美元。事關當地好多國家通脹太勁,搭完一程的士銀紙o既購買力都可以貶值到面目全非。

 

講話「夠」或者佢份身家斷億美元計,襟得蝕,普通市民揸住雞碎咁多,入次私家醫院已經可以同你洗袋!

 

雖然好多投資工具都話能夠有保本增值功用,但是,十年八年後購買力又唔見一截。暫時為止,見到比較有保值能力o既只得物業,住完幾十年,身價仲可以越賣越貴,名貴新車一落地身價都隨時大打折扣啦!

 

身家點叫做「夠」,真係識條鐵,答你唔到!總之,搵得到好搵,好天搵埋落雨柴,點知幾時會打柴!

 

 

相關標籤
私人住宅           通脹           樓價          投資者          全球經濟                              香港          現金         

劉晨
我叫劉晨,唔係樓神,
只想大家買賣物業時留神,
以免頭痕。