跳至主要內容
價勢堂
唔係樣樣投資可以鬥長命 15/2/2019

投資時抱住鬥長命o既心態,可以,但是,現實並非所有投資工具都能夠作長線持有。有D只適合短炒,有D更加唔可以長揸,你同佢鬥長命,分分鐘命都無,唔輸死都激死!

 

本港o既住宅樓,由於有一定需求,人口不斷增加,樓價貴就係貴D。香港o係經濟同政治上有一定價值,又係大都市,樓價都幾難有人人都買得起o既街坊價,否則劉晨實會多o左好多樓揸手。

 

股票係咪可以鬥長命,確係要逐隻秤,外匯都係,有D完全唔可以掂,事關好容易掂親都死,衰過劏豬櫈。太多股票古靈精怪,甚至係賊佬股,專搵小股東埋手,你走埋去就係自動送死。最慘買o左之後又會被財技玩殘,想走都難,有D仲會越輸越多,你想報仇只會輸得更多。

 

好多股票劉晨係呢一世都唔會沾手,話之佢有時突然升到飛天。雖則話富貴險中求,全港咁多股票,無謂以身犯險,走唔切就大檸樂。不過唔明白有D股票已曾被警告咪掂,股民仲係要買,出事就無乜幾多個人可憐你。研究股票o既功課,一定要做,無得懶,唔識字都要學,唔辛苦點得世間財!

 

相關標籤
私人住宅           樓價          股市                                                  香港          股票          外匯         

劉晨
我叫劉晨,唔係樓神,
只想大家買賣物業時留神,
以免頭痕。