跳至主要內容
價勢堂
政府買物業o既啟示 15/3/2019

財政司司長陳茂波說將來撥出200億元,購買60個物業,去提供130項社區設施,主要用作日間幼兒中心同長者鄰舍中心等措施。即刻又有人扣帽子,指責官商勾結。

 

政府長期一直都有使用私人市場o既物業,以前多數都係租,比較較少購買。三十多年以前,政府稅務局仲o係銅鑼灣,租用告士打道商廈做總部,1991年先至搬去剛起好o既灣仔稅務大樓。想當年,劉晨仲拎住張稅單去銅鑼灣排隊交稅,諗起稅單都肉痛,尤以九十年代初交得最甘,有成村人o既屋企都交得咁甘,極度肉赤,諗起都想喊。雖然可以郵寄,弊在驚寄失咁就死,罰錢罰到暈,親身去算啦。

 

幾十年前,政府租好多私人地方做辦公室,若果唔係政府有錢,交租都交到佢氣咳!呢次,波叔諗通o左,政府自己買地方提供服務,又畀人鬧,呢D人確係百彈齋主,乜都彈o翕得出就o翕。政府交租咪又係我地D血汗錢,業主一嗌加租,政府部門唔係磅水就係要搬竇,裝修設備唔係錢呀,搬一次條數都好係o野!

 

政府都買物業提供服務,佢地亦明白面服務連貫性幾咁重要,起碼唔使郁D都搬位,使用人士亦容易習慣。政府買物業做服務,其中一個證明的確買樓好過租,大家要見微知著!

 

 

 

相關標籤
整體樓市          買樓          工商舖          香港          政府         

劉晨
我叫劉晨,唔係樓神,
只想大家買賣物業時留神,
以免頭痕。