跳至主要內容
價勢堂
阿駝行路應付波濤洶湧 16/5/2019

美國總統侵侵搞呢鋪貿易戰,可謂曠日持久,對於投資者來講確係有唔細o既殺傷力。若果係唔等使o既投資,寧願將資金擺埋一二角,免得無啦啦送死。若果買樓o係香港唔係有實用價值,咁o既環境未必有咁多人樂意投資。

 

雖然侵侵話佢提高關稅可以逼使中國畀多D關稅,佢有無計到投資市場畀佢搞亂呢一年幾,有幾多美國人o係投資市場輸錢,呢條數一定大過佢賺埋條數多多聲,侵侵根本賺埋都未夠輸。好多美國人嬲佢又唔知鬧佢又唔好意思,搞風搞雨埋尾都唔知美國賺定蝕。

 

侵侵搞搞震,香港股市得多得佢唔少。劉晨成日彈港股成交奀豬,大體上咁o既成交係好事。若果人人大大啖嗒落去,港股先至纍低,咁就死得人多。好彩o既係股民都好多醒字派,唔大手買入股票,否則呢年幾都係揩多過撈,仲揩得好甘添!

 

買樓實在有幾多唔同,即使你唔買樓都要租樓住,租金呢條數o既開支無乜走雞,畀硬。租樓除o左得到住之外,一無所得,確係得個桔。買樓雖然話要畀首期,個個月亦要供樓,條數就差唔得幾遠,一段時間之後,供oo既錢可以息除本減,又有供甩之日,若果樓價升o左你仲賺多浸。

 

所以金融市場咁鬼波動,仲有唔少人肯入市買樓就係搏長線。投資市場動盪成咁,唔好期望樓市買家數量突然暴增,慢慢咁滲出來仲好。唔好要求太多,阿駝行路---------舂舂(中中)地得喇,咁可以長買長有。買家數量無咁波動,反而大家買得更安心,經紀又搵到食。好過食完一餐要吊幾個月鹽水,咁仲弊傢伙。

 

相關標籤
私人住宅           租金          樓價          供樓          買樓          租樓          美國                              香港         

劉晨
我叫劉晨,唔係樓神,
只想大家買賣物業時留神,
以免頭痕。