跳至主要內容
價勢堂
息減得多未必好 25/6/2019

美國總統特朗普破口大罵聯儲局主席鮑威爾,要佢拿拿林減息1厘,鮑威爾無佢咁好氣!一於等下先,畀著劉晨係聯儲局主席亦係咁做,擒擒青減息,可能引起好癌重後果,衰o左會孭好大個鑊,都係靠聯儲局中人專業判斷好過,以免第日無面見人。

 

霎時間減息1厘,傻o既都知道會令到投資市場例如股市、樓市、金市同匯市炒到飛起。你估家陣地球村入面o既先進城市人類仲係五十年前咁唔識o野咩,以前就話訊息傳播得慢,家陣全世界任何地點都幾乎可以直播,各地市場即刻有反應。

 

特朗普硬係想投資市場炒到天咁高,美國人全部賺大錢,個個都會話侵侵叻仔,投佢一票,幫助佢連任。不過侵侵睇落唔多識經濟,咁快減息1厘,消耗性上升爆完一浸,美國已經無乜息可減。須知美國家陣係2.25-2.5厘,減息1厘後就無幾多可減,之後無以為繼。

 

美國過去三年多加過九次息,合共加2.25厘,即是由0息加上來。以0.25厘當係一粒子彈,總共只得9粒,一o野用o4粒,所餘無幾,好容易又歸0!若果不幸有乜大鑊杰,子彈唔多夠用。當然美國可以學歐盟同日本玩負利率,趕晒D錢出街!若然再有乜衫長褲短發生,美國到時無藥可救,你估美國政治經濟炸彈少呀!

 

相關標籤
利息           減息           聯儲局          整體樓市          股市          美國          特朗普          政治          經濟          鮑威爾         

劉晨
我叫劉晨,唔係樓神,
只想大家買賣物業時留神,
以免頭痕。