個別大型屋村樓盤o既優質單位樓價高過1997年，即刻唔少人話香港樓市發癲，劉晨則覺得，發癲無咁早。破頂只係個別事件，並唔係整體全面突破，唔需要太過武斷話樓市發癲。不過金管局收緊按揭貸款，亦有助冷卻樓市過熱o既問題！

仲有家陣o既供樓負擔比率唔算高，只係三成零四成咁上下，同1997年o既七成或以上相比，仲相差接近一倍，唔需要咁快就話狼來了，否則第日真係狼來了o既時候，變成無反應就弊傢伙。

回想1997年o既時候，好多人賣當借都去搵錢買樓，供樓負擔比率扯得好盡。樓市一插落來，即刻杰過芝麻糊。家下o既比率只係三、四成，好多人仲有大把緩衝空間，唔會咁快殺到埋身，同1997年時期，完全唔同環境。港府有控制樓市o既措施，控制一下風險，只會有利樓市o既長遠發展。正是：

供樓比率唔算高，

唔似九七咁糟糕，

當年水平達七成，

家陣水位有排go！